Növbədənkənar seçkilər mövcud şəraitin siyasi təsbiti kimi dəyərləndirilə bilər

secki qutusu


Azərbaycanda növbədənkənar prezident seçkilərinə hazırlıq sürətlə davam edir. Artıq Mərkəzi Seçki Komissiyası da ilk qərarlarını verib və prosedurun tam həcmdə yerinə yetirilməsi üçün vaxt və tarixlər müəyyənləşdirilib. Adətən seçkili orqanlara və ya ölkə prezidentliyinə fövqəladə şəraitdə növbədənkənar seçkilər təyin olunur. Fövqəladə vəziyyət də özlüyündə xaos, gərginlik, qeyri-sabitlik və bu kimi şəraitləri ehtiva edir. Bu səbəblərdən də böyük-kiçikliyindən və inkişaf səviyyəsindən asılı olmayaraq bütün ölkələr üçün bu, arzuolunmaz haldır. İndi Azərbaycanda da “növbədənkənar seçkilər” məfhumunun işlədilməsi ilk baxışda təəccüblü görünür. Axı, ölkədə heç bir dağıdıcı təbiət hadisəsi, yaxud iqtisadi-siyasi müvazinətsizlik baş verməyib. Əksinə, əsrimizin ilk qərinəsində Azərbaycan dünyada əhalinin dövləti idarə edən siyasətçilərə ən çox etimad göstərilən top-20 ölkənin sırasına daxil olub. Mübaliğəsiz etiraf etmək gərəkdir ki, belə bir nailiyyətə çatmaq böyük uğurdur. Bu gün dünya ölkələrinin əksəriyyətində ciddi siyasi kataklizmlər baş verir, dünən dost olan ölkələr bu gün müharibə edirlər.
2023-cü il ölkəmiz üçün başa çatdırılan Zəfər ilidir. Gələn il müstəqil Azərbaycanın tarixində ilk dəfə olaraq seçkilər bütün ölkə ərazisində keçiriləcək. 44 günlük Vətən Müharibəsi və bu ilin antiterror tədbirləri nəticəsində ərazi bütövlüyümüzün və suverenliyimizin bərpası həm regionda, həm də ölkəmizdə yeni reallıqlar yaradıb. Növbədənkənar seçkilər ərazi bütövlüyümüzün və suverenliyimizin təsbitidir. Ölkənin belə bir ürəkaçan dövründə növbədənkənar seçkilərin keçirilməsi, açıq görünür ki, şəraitin ekstremallığından yox, idarəetmədə zəruri optimallığın yüksəldilməsindən, islahatların tempinin artırılmasından irəli gəlir.
Üstəlik, hazırkı prezident və dövlət başçısı postuna real namizəd olan İlham Əliyevin şəxsi xarakterik cizgiləri, Azərbaycan torpaqlarını 30 il ərzində işğalda saxlayan beynəlxalq şər qüvvələrə qarşı mübarizəni beynəlxalq aləmdə genişləndirməsi seçkilərin növbədənkənar keçirilməsinin zəruriliyini ortaya qoya bilər. Yəni, elə bir situasiyada seçki keçirmək gərəkdir ki, prezident olmağı arzulayan hər kəs bu marafonda çətinlik çəkmədən iştirak edə bilsin. Çünki, namizəd olaraq İlham Əliyevin seçilmək şansı şübhəsizdir, özü də buna inamlıdır, lakin yenə də hamı üçün bərabər imkanlar yaratmaq arzusu prezident seçkilərinin daha münasib vaxta keçirilməsini şərtləndirir. Bu isə demokratik quruculuq yolunda mühüm addımdır. Bu mənada Prezidentin növbədənkənar seçkilər keçirmək barədə qərar qəbul etməsi həm də yeni siyasi iradə nümayişidir.
Azərbaycan siyasətin və iqtisadiyyatın bütün sahələri üzrə inkişaf edir. Bu faktı daxili və xarici ekspertlər, politoloqlar, iqtisadçılar, dövlət başçıları, ictimasi-siyasi xadimlər, sənət adamları, işgüzar dairələr etiraf edir, görür, qiymətləndirir, təqdir edirlər. Lakin qəribədir ki, elmi biliyi, daşıdığı vəzifəsi, nüfuzu ilə sanballı olan insanların verdiyi qiymətləri Qərbin pulları hesabına demokratik dona bürünən və ya heç yerdə tanınmayan kimlərsə qəbul etmək istəmir, doğulub böyüdüyü ölkəyə böhtanlar yağdırır. Adətən bu cür fəaliyyət mühüm siyasi hadisələr baş verən ərəfədə güclənir. İndi də növbədənkənar prezident seçkiləri elan olunduqdan sonra pozuculuq fəaliyyətləri artmaqdadır. Təbii ki, bu fəaliyyətin arxasında Azərbaycanı istəməyən qüvvələr, xüsusilə də xaricdəki erməni lobbisi dayanır. Siyasi gedişlərdən xəbərdar olan insanlar belə gedişlərin necə dolayısı ilə həyata keçirildiyindən xəbərdardırlar. İndi də iradəcə səbatsız olan bəzi azərbaycanlılar sadəcə varlanmaq eşqi ilə xarici pozucu qüvvələrin diqqətini cəlb edirlər. Bundan sonra isə alver və böhtan kampaniyasına start verilir. Lakin bütün bunlar əbəsdir. Azərbaycanda siyasi qüvvələrin öz inkişaf yolu var və bu istiqamətdə təxribatlar törətmək absurd cəhdlərdən başqa bir şey deyil.

Novruz NOVRUZOV

Azad Vətən Partiyasının Siyasi Şurasının sədri

Zəfərlərimizin Kəlbəcər günü


25 noyabr – Kəlbəcər günüdür

kelbecer

Vətən müharibəsində qazandığımız böyük Zəfərin təntənəsi işğaldan azad edilmiş şəhərlərdə qeyd edilən bayramlarda aydın hiss olunur. Kəlbəcər şəhəri günü bu bayramlardandır. Kəlbəcərin işğalı da digər rayonlar kimi ağır və yeri doldurulan bilməyən insan tələfatları ilə müşayiət olunub. Himayədarlarına arxalanan ermənilər azərbaycanlıları məhz azərbaycanlı olduqları üçün öldürüb, doğma yurd-yuvalarından qovublar. Ağdaban kəndi Kəlbəcər rayonunda, Ağdaban çayının sağ sahilində, Ağdaban dağının yamacında, Murovdağ silsiləsinin cənub ətəyində, rayon mərkəzindən 36 km şimal-şərqdə yerləşir.
1992-ci il aprelin 7-dən 8-nə keçən gecə Ermənistan silahlı birləşmələri Dağlıq Qarabağdakı separatçı erməni quldur dəstələrinin köməyilə Kəlbəcərin Ağdaban və Çayqovuşan kəndlərinə hücum etdilər. Hücumdan xəbərsiz olan kənd əhalisi başıaçıq-ayaqyalın qarla örtülü meşələrə, dağlara dağıldı. Kəndləri müdafiə edən kiçik dəstə ermənilər tərəfindən məhv edildiyindən əhali müdafiəsiz qaldı. Erməni daşnakları Ağdaban kəndinə soxularaq 130-dan çox evi tamamilə yandırdılar, 779 nəfər dinc sakinə divan tutdular. Onlar yaşlı, qoca, qadın, uşaq demədən dünyada görünməmiş ən qəddar üsullarla dinc əhalini qətlə yetirərək soyqırım aktı törətdilər. Bu faciə zamanı 32 nəfər amansızcasına qətlə yetirilmiş, 8 nəfər 90-100 yaşlı qoca, 2 nəfər azyaşlı uşaq, 7 nəfər qadın diri-diri odda yandırılmışdır. Həmçinin, 2 nəfər itkin düşmüş, 12 nəfərə ağır bədən xəsarəti yetirilmiş, 5 nəfər isə girov götürülmüşdür.
Bu qanlı hadisədən bir il sonra, 1993-cü il 2 aprel tarixində Ermənistan Respublikasının Silahlı Qüvvələri tərəfindən Kəlbəcər rayonu işğal olunan zaman 511 dinc sakin öldürülüb, 321 adam əsir götürülüb və itkin düşüb. İşğal nəticəsində Kəlbəcərin əhalisi respublikanın 56 rayonunun 770 yaşayış məntəqəsində müvəqqəti məskunlaşmağa məcbur oldu. İşğal nəticəsində onlarla tarixi-mədəniyyət abidəsi, 97 məktəb, 9 uşaq bağçası, 116 kitabxana, 43 klub, 42 mədəniyyət evi, tarix-diyarşünaslıq muzeyi, 9 xəstəxana, 75 tibbi məntəqə, 23 ambulatoriya, 9 aptek, yüzlərlə inzibati bina, minlərlə mənzil, yüzlərlə maşın, texnika və s. talan edildi, dağıdıldı və rayonun milyardlarla manatlıq sərvəti Ermənistana daşındı. Azərbaycan xalqı öz rəhbəri və ordusu ilə birlikdə məqsədyönlü şəkildə işğala qarşı mübarizə apardı. Torpaqlarımızın azad edilməsinin yolu asan olmayıb. Bu tarixi Zəfərin arxasında gərgin diplomatik mübarizə, güclü iqtisadiyyat uğrunda ciddi səylər, böyük ordu quruculuğu, sarsılmaz mənəvi hazırlıq durur.
Dövlətimizin başçısı, Azərbaycan Silahlı Qüvvələrinin Ali Baş Komandanı İlham Əliyevin fəaliyyəti azadlıq yolunun çətinliyini real əks etdirir. Hadisələrin cərəyan etdiyi dövrdə Azərbaycan rəhbərliyi dəfələrlə Qarabağın azadlığı prosesində destruktiv rol alan qüvvələrə qarşı qətiyyətli mövqe sərgiləyib. Hələ 2016-cı ildə Nazirlər Kabinetinin iclasında Prezident İlham Əliyevin çıxışı Azərbaycana qarşı beynəlxalq cəbhə yaratmış güclərə qarşı aparılan diplomatik müharibənin kulminasiya nöqtəsi sayıla bilər. Çünki, kimlərsə Dağlıq Qarabağ müharibəsini dondurulmuş münaqişə kimi xarakterizə edirdi. Bu, destruktiv qüvvələrin dünya ictimaiyyətində formalaşdırmaq istədiyi fikir idi və Azərbaycan rəhbərliyinin və xalqının bununla guya razılaşması barədə illüziya yaratmaq məqsədi güdürdü. Həqiqətdə isə Dağlıq Qarabağ uğrunda kəskin diplomatik mübarizə gedirdi. Prezident İlham Əliyev iclasda bu haqda da danışaraq mövqeyini bir daha ortaya qoymuşdu: “Siz yəqin ki, Amerikadan səslənən son bəyanatı da eşitmisiniz, oxumusunuz, Azərbaycan ictimaiyyəti də bunu bilir. Bu, yumşaq desək, təəccüb doğuran bir bəyanatdır. Azərbaycanı münaqişənin həll olunmamasında günahlandırmaq ən azı insafsızlıqdır. Digər tərəfdən, bax, bu bəyanat o biri bəyanatlarla necə uzlaşır?! Axı, Amerika, Rusiya, Fransa prezidentlərinin dəfələrlə bəyan etdikləri bir tezis var: “Status-kvo qəbuledilməzdir”. Biz bunu alqışlayırıq. Düzdür, bu sözdən sonra heç bir praktik iş aparılmır. Amma hər halda bu sözün artıq ortaya çıxması bizim böyük uğurumuzdur. Belə bir ciddi bəyanat ola-ola, “hər iki tərəf günahkardır, tərəflər buna hazır deyil, bu məsələ Fələstin-İsrail münaqişəsindən də mürəkkəbdir” demək sadəcə olaraq Ermənistanın işğalçı siyasətinə dəstək verməkdir”.
Tarix sübut etdi ki, bu fikirlər, təkziblər təsadüfi deyilməyib və Azərbaycan Vətən müharibəsində nəinki Ermənistana, həm də beynəlxalq şər qüvvələrə qalib gəlib. Bu gün Kəlbəcərin coğrafi ərazisinin yüksəkliyindən görünən təbiətin füsunkar panoramı həm də qələbəmizin möhtəşəmliyini nümayiş etdirir. Bu bölgə həm hərbi-strateji nöqteyi-nəzərdən böyük əhəmiyyət daşıyır, həm də iqtisadi potensialı etibarı ilə zəngin resurslara malikdir. 30 il ərzində qəsbkarlar digər ölkələrin şirkətləri ilə əlbir olub regionun təbii ehtiyatlarını talayıblar. Ancaq özbaşınalıq, işğalçılıq birdəfəlik bitib. Azərbaycan öz ərazi bütövlüyünü və süverenliyini bərpa edib. Xalqımız öz sərvətlərinə yiyələnib. Kəlbəcir və işğaldan azad edilmiş digər şəhər və kəndlərimiz əsl inkişaf yoluna çıxıb. Tezliklə Qarabağ bölgəsi Azərbaycanın sürətlə inkişaf edən turizm və sənaye bölgəsinə, firavan yaşayış məskəninə çevriləcək.
Novruz NOVRUZOV
Azad Vətən Partiyası Siyasi Şurasının sədri

Düşmənin Xirosimaya çevirdiyi Ağdam gələcəyin şəhəri olacaq

20 noyabr Ağdam şəhəri günüdür

dagilmish Agdam

Xarici jurnalistlərin və politoloqların “Qafqazın Xirosiması” adlandırdıqları Ağdamın işğaldan azad edilməsinin 3 ili tamam oldu. Azərbaycanın qədim mədəniyyətə, güclü iqtisadi resurslara, zəngin inkişaf enerjisinə malik bu şəhər ötən əsrin sonrarına yaxın Qarabağda ermənilərin başladığı separatçılıq hərəkatının qarşısında duran ən mübariz istehkam idi. Lakin arxalarında böyük dövlətlərin dayandığı Ermənistan Ağdamı da işğal edə bildi. Ermənilər işğal etdikləri ərazilərdə hər cür zorakılığa, dağıntıya və istismara rəvac verirdilər. İsveçrəli jurnalist Andre Vidmer işğaldan 16 il sonra Qarabağda olarkən gördüklərindən dəhşətə gəlmişdi. Amerikalı siyasətçi Metyu Brayzanın ermənilər tərəfindən viran qoyulduğuna görə “Ruhlar şəhəri” adlandırdığı Ağdam şəhərində müşahidə etdiklərini A.Vidmer belə təsvir etmişdi: “Şəhərin xarabalıqları arasında hələ də vurnuxan ermənilər küçələri qazaraq kanalizasiya borularını çıxarıb maşınlara yükləyirdilər”. Bu cür barbarlığa regionun mədəni və təbii sərvətlərinin talanmasını, xarici şirkətlərlə qanunsuz əməkdaşlıq nəticəsində qiymətli metalların emalı və xaricə daşınması, tikinti materiallarının aparılaraq Ermənistanda gen-bol istifadə edilməsi də əlavə olunanda erməni qəsbkarların əməlləri haqqında aydın təsəvvür yaranır. Mütəxəssislərin bildirdiyinə görə, işğal olunmuş ərazilərdə 460 növdən çox yabanı ağac və kol bitkiləri bitir. Bunlardan 70-i dünyanın heç bir yerində təbii halda bitmir. Ağdam şəhərində yaşı 150-250 ilədək olan 6 ədəd, Şelli, Seyidli, Sarıhacılı, Əliağalı kəndlərində yaşı 200-250 il olan 8 ədəd, Boyəhmədli kəndi ətrafında yaşı 400 ilə çatan 71 ədəd təbiət abidəsi kimi qorunan, pasportlaşdırılmış Şərq çinarları məhv edilib. Təkcə Ağdamın dağıdılması ilə rayona 5 milyard manatlıq ziyan vurulub.
Azərbaycan xalqı işğalçıları qovmaq və suverenliyini bərpa etmək üçün özündə qüvvə tapdı və Ali Baş Komandan İlham Əliyevin mübariz siyasəti sayəsində xalqımız yumruq kimi birləşərək düşməni Qarabağdan qovdu. 44 günlük Vətən müharibəsinin ilk ayında Azərbaycan ordusu işğalçılara elə zərbə vurdu ki, Ağdam şəhəri və ətrafındakı kəndlər bir güllə atılmadan azad edildi. Yəni, ermənilər canlarını cəbhədən qaçmaqla qurtardılar və bir neçə rayonu ultimatumla boşaltdılar. Bu, böyük Zəfər, tarixi qələbə idi.
Qarabağ işğaldan azad edildikdən sonra viran qoyulmuş şəhər və kəndlərimizin, o cümlədən Ağdamın bərpası prosesinə start verildi. 2021-ci 28 may tarixində Azərbaycan ictimaiyyətinə şəhərin Baş Planı təqdim olundu. Bu plan əsasında Ağdam tamamilə bərpa olunacaqdır. Artıq şəhərin özündə bir neçə müəssisənin və yaşayış komplekslərinin inşası uğurla gedir. Xıdırlı, Baş Qərvənd və Sarıcalı kəndlərində məhəllələrin təməli qoyulub. Şəhərdəki məşhur 1 nömrəli məktəbin tikintisi isə artıq yekunlaşıb.

yeni agdam1

Ümumiyyətlə, Ağdamın baş planı müasir şəhərsalma prinsiplərinə ən yüksək səviyyədə tam cavab verir. Köhnə Ağdam tədricən inkişaf edib böyüdüyünə görə şəhərin arxitekturasında müəyyən ziddiyyətlər tapmaq olardı. Bu gün tikilən Ağdamda isə arxitekturanın ahəngdarlığı struktur baxımından mükəmməl olacaq. Əhalinin rahatlığı, şəhər mənzərələrinin gözəlliyi, sosial obyektlərin və inzibati binaların yerləşməsi yaşayış tərzinin dolğunluğunu təmin edəcək. Əminliklə demək olar ki, Ağdam şəhəri tam bərpa olunandan sonra özündə böyük Zəfərin təntənəsini hiss etdirəcək.
Novruz NOVRUZOV
Azad Vətən Partiyasının Siyasi Şurasının sədri

Əlaqələrin inkişafı üçün möhkəm siyasi və iqtisadi təməl var

 

Bu gün Azərbaycan iqtisadiyyatının əsas mövzularından biri neft və qeyri-neft sektoru arasında əlaqəli inkişafın təsbit olunmasıdır. Bu iş çoxdan başlanılıb, sadəcə indi başlanmış işin davamlılığının və vaxtaşırı dəyişən parametrlərin bir-birilə uzlaşmasının təminidir. Çünki, neft gəlirləri vaxtilə ölkədə əsas iqtisadi kursu təyin edən amil rolunda çıxış edirdi. Düzgün iqtisadi strategiya sayəsində həmin gəlirlər məqsədyönlü şəkildə insan kapitalına və qeyri-neft sektorunun inkişafına yönəldilib. Bu gün artıq qeyri-neft sektoru neft sektoruna çatıb və onu ötüb keçməyi hədəfləyib. Bunun arxasında isə hökumətin ardıcıl olaraq həyata keçirdiyi tədbirlər dayanır.
Bu sırada ilk olaraq qanunvericilik bazasının sadələşdirilməsi və təkmilləşdirilməsi durur. Hazırda Azərbaycan qanunvericiliyinə görə biznes qurmaq çox asandır. Bütün bürokratik əngəllər, süni maneələr aradan qaldırılıb. Hətta əsassız və yersiz, işin ləngiyməsinə səbəb olan vergi yoxlamaları da ləğv edilib. Bütün iqtisadi parametrlər üzrə sahibkarlar sərbəst fəaliyyət meydanı əldə ediblər. Onlara işləmək, istehsal etmək, azad surətdə satmaq imkanı yaradılıb və qarşılarına vergiləri vaxtında ödəmək tələbi qoyulub.
Bu irəliləyiş ölkədə həyata keçirilən davamlı islahatların məntiqi nəticəsidir. Məhz bu islahatlar fonunda strateji hədəf olaraq iqtisadiyyat liberallaşdırılır və şaxələndirilir, kiçik və orta sahibkarlıq inkişaf edir, qeyri-neft sektorunun ümumi daxili məhsulda çəkisi getdikcə artır. Yaradılan əlverişli biznes mühiti isə ölkə iqtisadiyyatına daha çox daxili və xarici sərmayələrin cəlb edilməsi üçün əlavə imkanlar yaradır. Sözsüz ki, burada ictimai-siyasi sabitlik faktoru da ciddi rol oynayır. Bu göstəriciyə görə, Azərbaycan dünya ölkələrinin hər 4-dən 3-nü üstələməyə müvəffəq olub. Hətta G20-yə daxil olan İtaliya, Rusiya, İndoneziya, Hindistan, Türkiyə, Cənubi Afrika Respublikası kimi nəhəng ölkələr də iqtisadiyyatın rəqabət qabiliyyəti indeksinə görə Azərbaycandan geridə qalır. Azərbaycan rəqabət qabiliyyətinin gücünə görə MDB məkanında öz liderliyini inamla qoruyur.
İqtisadi Əməkdaşlıq Təşkilatının (ECO) Özbəkistanın paytaxtı Daşkənddə keçirilən 16-cı Zirvə toplantısında Azərbaycan Prezidenti İlham Əliyevin iştirakı və çıxışı ölkəmizin bu təşkilata daxil olan ölkələrlə iqtisadi əlaqələrinin miqyasına aydınlıq gətirib. Dövlət başçısı bildirib ki, son 20 il ərzində Azərbaycan iqtisadiyyatına 310 milyard ABŞ dolları həcmində sərmayə qoyulub və bunun 200 milyard dolları qeyri-neft sektorunun payına düşür. Bu, kiçik rəqəm deyil və müasir texnologiyalar əsasında sənaye sahələrinin inkişafının stimullaşdırılmasında həlledici rol oynayır. Təbii ki, bu sırada Türkiyə, Pakistan, İran, Qazaxıstan, Özbəkistan kimi ölkələrin xüsusi çəkisi var. Azərbaycandakı mövcud investisiya imkanları yerli sahibkarlarla yanaşı, xarici investorları da ölkəmizə cəlb edir. Bu gün Azərbaycana sərmayə qoyan şirkətlərin sayı ilə yanaşı, onların coğrafiyası da ildən-ilə genişlənir.
Azərbaycan inkişafa iqtisadçıların birtərəfli istiqamət hesab etdikləri neft ölkəsi qismində başlasa da indi geniş sferada hərtərəfli iqtisadi yüksəlişə malikdir. Daha heç bir iqtisadçı Azərbaycan iqtisadiyyatının istiqamətini təhlil edəndə “Holland sindromu” deyimindən istifadə etmir.
Ölkəmiz öz təbii sərvətləri, insan kapitalı, sənaye və qeyri-neft sektorunun müxtəlif sahələri ilə çoxprofilli iqtisadiyyatını sürətlə irəlilədir. Bunun üçün isə ilk növbədə ictimai sabitlik, müvafiq qanunvericilik bazası, biznes prosedurlarının sadələşməsi, gələcəyə inam və sairə məsələləri həll etmək lazım idi. Bütün bunlar vaxtında, müasirlik ruhunda həyata keçirildi və inkişafa təkan oldu. Ölkədə onlarca yeni elektrik stansiyaları tikildi. Hökumətin bu sahəyə belə böyük dəyər verməsi həm yeni müəssisələrin işə salınmasında, həm də əhalinin sosial güzəranının yaxşılaşdırılmasında elektrik enerjisinin əsas rol oynadığına görədir. Nəticədə Azərbaycan elektrik enerjisi idxalçısından ixracatçısına çevrilib. Görülən işlərin hamısı məqsədyönlüdür və yalnız innovativ xarakter daşıyır. Azərbaycan tikdiyi hər bir müəssisədən, istehsal sahəsindən gəlir götürür.
İş davam edir. Bu ilin vəzifələri ötən ildəkindən daha məsuliyyətlidir. Çünki, özül yaranıb. Stimul güclüdür. Demək, gələcəyə inam da artıb. Azərbaycan xalqı öz dövləti və qurucu rəhbəri ilə yalnız irəliyə baxır.
Qeyri-neft sektorunun mühüm məziyyətlərindən biri də inzibatçı-amirlik sisteminin iqtisadi strukturdan uzaqlaşmasıdır. Çünki, əhali özü öz arzusu ilə hökumətin yaratdığı şəraitdən istifadə edərək özünə iş yeri yaradır. Bu məsələdə hər bir fərd sərbəstdir, hökumət bu işdə ona yalnız kömək edir, yəni, güzəştli kreditlər ayırır, iri layihələrin həyata keçirilməsində dəstək olur, xarici bazarlara çıxış üçün dövlətin gücündən və nüfuzundan istifadə edir.
Azərbaycan öz legitim hüququndan istifadə edərək Vətən müharibəsində Ermənistanı döyüş meydanında məğlubiyyətə uğratdı və BMT Təhlükəsizlik Şurasının 1993-cü ildə qəbul etdiyi və 27 il ərzində kağız üzərində qalmış dörd qətnamənin icrasını özü təmin etdi. Bununla da ölkənin böyük bir ərazisini təşkil edən Qarabağ bölgəsi işğaldan azad oldu. 3 ildir ki, bu bölgədə böyük quruculuq işləri görülür, dağıdılmış şəhər və kəndlər bərpa edilir, eyni zamanda yeni sənaye müəssisələri tikilir, bu müəssisələr iqtisadiyyatın inkişafına öz töhfələrini verir. İqtisadi Əməkdaşlıq Təşkilatının üzvləri bu prosesdə könüllü iştirak edir, qarşılıqlı faydalı əlaqələrin inkişafına çalışırlar. Özbəkistanın işğaldan azad edilmiş Füzuli rayonunda tikdiyi məktəb binası buna gözəl nümunədir.
Daşkənd toplantısında Prezident İlham Əliyevin üzv dövlətlərin başçıları ilə keçirdiyi görüşlər, apardığı müzakirələrin məzmunundan görünür ki, İƏT (ECO) daxilində qarşılıqlı faydalı əməkdaşlıq bundan sonra daha sürətlə inkişaf edəcəkdir. Bunun üçün möhkəm siyasi və iqtisadi təməl var.

Novruz NOVRUZOV
Azad Vətən Partiyası Siyasi Şurasının sədri

Lider ölkənin lider rəhbəri və gələcək zəfərlərə doğru

paradxan
Azərbaycan xalqı xoşbəxt xalqdır ki, əsrlər boyu torpağımıza, dövlətçiliyimizə, insanlarımıza düşmən kəsilmiş erməni adlı nankor qüvvəyə qarşı apardığımız azadlıq mübarizəsində birdəfəlik olaraq məqsədinə çatdı. Daha düşmən ərazilərimizi işğal edə, şəhər və kəndlərimizi dağıda, insanlarımızı əsarətə ala bilməyəcəklər. Nə erməni terrorçuları, nə də Ermənistan adlı oyuncaq dövlətin
rəhbərləri bizə kişilikdən, Bakını işğal edib burada çay içməkdən, Şuşada qol-boyun olub yallı getməkdən danışa və həzz ala bilməyəcəklər. Biz qalib millət, qalib xalq, qalib dövlətik!
Böyük Zəfər bayramı münasibətilə Xankəndidə hərbi paradda iştirak edən Prezident, Ali Baş Komandan İlham Əliyev çıxış edərək deyib: “Mən bir daha demək istəyirəm ki, biz 20 il ərzində bu günə doğru gedirdik, hazırlıq işləri gedirdi, beynəlxalq hüquq müstəvisində Azərbaycan mövqeləri möhkəmləndirilirdi. Siyasi müstəvidə apardığımız uğurlu fəaliyyət nəticəsində bütün dünya artıq bilməyə başlamışdır ki, haqlı tərəf bizik. İqtisadi sahədə apardığımız islahatlar imkan verdi ki, müstəqil iqtisadiyyat quraq, heç kimdən asılı olmayaq, öz həyatımızı özümüz quraq. Güclü siyasi iradə imkan verdi ki, müstəqil xarici siyasət aparaq, daxili siyasət aparaq, imkan verməyək kimsə bizim işimizə müdaxilə etsin. Halbuki belə cəhdlər tarixdə çox olmuşdur. Dövlətimizi, milli ləyaqətimizi, həyat tərzimizi, ənənələrimizi qorumuşuq ki, heç kim bizim işlərimizə burnunu soxmasın”.
Dövlət başçısının dediyi bu sözlər bu gün Azərbaycanın nüfuz etdiyi beynəlxalq siyasi dairənin reallığıdır. Başqa sözlə, ölkəmiz Cənubi Qafqazın lider dövlətidir və onsuz regionda hər hansı iqtisadi və siyasi layihənin reallaşdırılması mümkünsüzdür. Belə bir yüksək məqama yüksəlmək olduqca çətin prosesdir və hər ölkəyə nəsib olmur. Çünki, strateji və taktiki, istər siyasi, istərsə də iqtisadi addımlar dəqiqliklə ölçülüb biçilməli, tam şəkildə yerinə yetirilməlidir. Azərbaycan bu tarixi yolu uğurla keçib və əzmlə davam etdirir. Bütün bu uğurların önündə, etiraf etmək lazımdır ki, prezident İlham Əliyev gedir. Keçilən yolun çətinliyinə və mürəkkəbliyinə diqqət edəndə aşkar görünür ki, yalnız İlham Əliyev səviyyəsində bir rəhbər belə uğura imza ata bilərdi. Bu fakt təkcə Azərbaycandan deyil, dünyanın bütün guşələrindən baxanda aydın görünür. Buna neçə-neçə misal çəkmək olar.
Ukrayna Silahlı Qüvvələrinin zabiti, hərbi-siyasi şərhçi Taras Berezovets böyük Zəfərlə bağlı Report İnformasiya Agentliyinin Şərqi Avropa bürosuna açıqlamasında deyib: “Əlbəttə ki, bu qələbə uzun illər ərzində Silahlı Qüvvələrdə aparılan islahatlarsız mümkün olmazdı. Bu islahatlar ardıcıl şəkildə həyata keçirilib. Mən Azərbaycan Prezidenti İlham Əliyev tərəfindən ölkənizə dəvət olunmaq şərəfinə nail olmuşam. Nəticədə Azərbaycan Ordusunda həyata keçirilən islahatları gözlərimlə görmüşəm. Əslində, Azərbaycan Ukraynanın ərazi bütövlüyünü necə bərpa edəcəyinə də nümunədir. Ukrayna NATO standartlarına uyğun ordu yaratdıqdan sonra məhz belə hərbi qələbə qazanmalıdır. Ukraynanın strateji baxımdan dostu olan Azərbaycanın qələbəsi isə şübhəsiz, bizim üçün çox əla xəbərdir və bu münasibətlə hər kəsi təbrik edirəm”.
Heç şübhəsiz, ölkəmizin suverenliyinin möhkəmləndirilməsi uğrunda dövlət başçısının rəhbərliyi ilə xalqın qətiyyətli mübarizəsi davam edəcək. Əhalinin rifah halının yaxşılaşdırılması üçün sosial layihələr gücləndiriləcək, işğaldan azad edilmiş bölgələr sürətlə yenidən tikiləcək, abadlaşdırılacaq. İlham Əliyevin prezidentlik imicini formalaşdıran və məşhurlaşdıran, habelə müasir situasiyada optimal inkişaf yolunun tapılmasında əhəmiyyətli rol oynayan məsələlər bunlardır. Bu panoram həm ölkə daxilində, həm də xaricdə aydın görünür və təqdir olunur. Ola bilər ki, xaricdə kimlərəsə sərf etməsin, amma Azərbaycan xalqı öz rəhbərinə inanır və etibar edir.

Novruz NOVRUZOV
Azad Vətən Partiyası Siyasi Şurasının sədri

1 -dən səhifə 132

Oxşar məqalələr