Bu şəkillər Xəzərin suyunun builki azalmasından sonra Qum adasında çəkilib. Bir neçə ay əvvəl dəniz suyunun ləpələndiyi bu ərazidə indi neft hopması səbəbincə mazutlu torpaq qalıb. İnsanlara milyardlarla vəsait verən “qara qızıl”ın çürkləndirdiyi torpağın təmizlənib əvvəlik halına qaytarılması üçün “ağ qızıl”dan əldə edilən milyardları bu işə yönəltmək lazımdır. Hardasa, “aldım qoz, satdım qoz” məsəli yada düşür. Amma, yox! Həyatın axarı belədir. Burdan alıb, orda itirirsən, ordan alıb burda itirirsən. İtirməmək üçün gərək nefti elə çıxarasan ki, sonradan dizinə döyə-döyə qalmayasan. Müstəqilliyə qədər bizdə sadəcə neft hasil edilməyib, təbii sərvətlər istismar edilib. Bizə qalan isə dənizə basdırılan və indi paslanıb akvatoriyanı çirkləndirən dəmir borular, suda qalan qaralmış yöndəmsiz daşlar və mazutlu gölməçələrdir. Bunların təmizlənməsinin ağırlığı isə müstəqiol dövlətimizin çiynindədir.
İKSmedia.az

Vətəndaşların yaşayış yerini tərk etmələrinə icazə verilən halların detalları məlum olub.

Nazirlər Kabineti yanında Operativ Qərargahndan Teleqraf.com-a verilən məlumata görə, vətəndaşlar təxirəsalınmaz tibbi zərurətlə və hər hansı bir qrafik üzrə müalicə almaq, ərzaq və digər gündəlik tələbat mallarının, habelə dərman vasitələrinin alınması, bank və poçt xidmətlərindən istifadə edilməsi zərurəti və yaxın qohumunun dəfnində iştirakla əlaqədar yaşayış yerlərindən çıxa bilərlər.

Bu şəxslər yaşayış yerini tərk etmək üçün icazə almaq məqsədilə 8103 nömrəsinə SMS məlumat göndərməlidirlər (SMS məlumatlar ödənişsizdir). SMS məlumatın mətnində aşağıdakı 3 indeksdən biri və şəxsin şəxsiyyətini təsdiq edən məlumat qeyd edilməlidir.

1 rəqəmi təxirəsalınmaz tibbi zərurətlə və ya qrafik üzrə müalicə almaqla əlaqədar yaşayış yerini tərk etmək üçün (icazə rayon və şəhər daxilində 2 saat müddətinə verilir, rayonlar və şəhərlərarası hərəkət zərurəti yarandıqda olduğu ünvanla getməli olduğu ünvan arasında məsafə və müalicə prosedurunun müddəti nəzərə alınır, geri qayıtma müddəti həkim tərəfindən verilən arayışla müəyyən edilir və zərurət olduqda polis əməkdaşlarına təqdim edilir);

2 rəqəmi - ərzaq və digər gündəlik tələbat mallarının, habelə dərman vasitələrinin alınması, bank və poçt xidmətlərindən istifadə edilməsi zərurəti ilə əlaqədar yaşayış yerini tərk etmək üçün (icazə 2 saat müddətinə gündə 1 dəfə verilir);

3 rəqəmi - yaxın qohumunun dəfnində iştirakla əlaqədar yaşayış yerini tərk etmək üçün.

Şəxsiyyəti təsdiq edən məlumatlar aşağıdakılardır:

Azərbaycan Respublikasının vətəndaşları üçün – şəxsiyyət vəsiqəsinin seriya və nömrəsi (məsələn, AZE11111111),

Azərbaycan Respublikasında müvəqqəti və ya daimi yaşayan əcnəbilər və ya vətəndaşlığı olmayan şəxslər üçün – Azərbaycan Respublikasının ərazisində müvəqqəti və ya daimi yaşamaq üçün icazə vəsiqəsinin seriyası və nömrəsi (MYİ (DYİ)1111111),

Azərbaycan Respublikası ərazisində müvəqqəti olma müddəti uzadılmış əcnəbilər və ya vətəndaşlığı olmayan şəxslər üçün – müvəqqəti olma müddətinin uzadılması barədə qərarın seriyası və nömrəsi (MOM1111111).

Nümunə: ərzaq və digər gündəlik tələbat mallarının, habelə dərman vasitələrinin alınması, bank və poçt xidmətlərindən istifadə edilməsi zərurəti ilə əlaqədar yaşayış yerini tərk etmək üçün 2 AZE1111111 məzmunlu SMS məlumatı göndərilməlidir.

Elektron Hökumət informasiya sistemindən gələn cavab SMS məlumatında icazənin qüvvədə olduğu müddət göstərilir. Şəxs yaşayış yerini yalnız müsbət cavab aldıqdan sonra tərk edə bilər.

Həyat və sağlamlığa bilavasitə təhlükəli vəziyyət yarandıqda yaşayış yerini tərk etmək üçün SMS məlumatın göndərilməsi tələb olunmur. Həmçinin şəxslər məhkəməyə və ya hüquq mühafizə orqanlarına çağırıldıqda SMS göndərilmədən yaşayış yerini tərk edirlər. Bu halda onlar məhkəməyə və ya hüquq mühafizə orqanına çağırılmalarına dair sənədi polis əməkdaşlarının tələbi ilə onlara təqdim etməlidirlər.

SMS icazə sistemindən istifadə qaydaları və SMS göndərilməsi ilə bağlı yaranan çətinliklərlə əlaqədar Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN Xidmətin) 9108 Çağrı Mərkəzinə müraciət edilə bilər.

Müvafiq dövlət qurumları və özəl hüquqi şəxslər əməkdaşları barədə, habelə müvafiq könüllülər təşkilatları könüllülər barədə məlumatları “icaze.e-gov.az” portalına 3 aprel 2020-ci il saat 10:00-dan etibarən daxil etməlidirlər.

Bu Qərarda nəzərdə tutulmuş qaydada şəxslərin hərəkəti zamanı şəxsiyyəti təsdiq edən sənədlərin üzərlərində olması məcburidir.

Hərəkət məhdudiyyətlərinin tətbiqi qaydalarının pozulması halları xüsusi karantin rejiminin pozulması kimi qiymətləndirilməklə, İnzibati Xətalar və Cinayət məcəllələrində nəzərdə tutulmuş məsuliyyətə səbəb olacaqlar. Eyni zamanda, “icaze.e-gov.az” portalı vasitəsilə icazənin alınması üçün yanlış məlumatın daxil edilməsi və yaşayış yerini tərk etmək üçün SMS sistemi vasitəsilə icazə alınması prosedurundan sui-istifadə halları daim araşdırılacaq, belə hallara yol verən hüquqi və fiziki şəxslər barəsində ciddi məsuliyyət tədbirləri görüləcəkdir.

Nazirlər Kabineti yanında Operativ Qərargahın qərarı ilə martın 29-da saat 00:00-dan etibarən ölkə ərazisində xüsusi karantin rejimi gücləndirilib.

Qaynarinfo xəbər verir ki, bununla bağlı Operativ Qərargahın martın 27-də yaydığı məlumata əsasən, xüsusi karantin rejimi dövründə xüsusi təyinatlı, o cümlədən təcili tibbi yardım, qəza-bərpa, xilasedici, kənd təsərrüfatı, sosial xidmət məqsədli, habelə yükdaşıyan avtomobillərin hərəkəti istisna olmaqla, rayonlararası və şəhərlərarası nəqliyyat hərəkəti tam dayandırılır.

Bakı, Sumqayıt şəhərləri və Abşeron rayonunun hüdudları daxilində hərəkət sərbəstdir.

Nəqliyyat vasitələri üzrə:

Bakı metrosunun iş vaxtı səhər 07:00-09:00 və axşam 17:00-20:00 saatlarına müəyyən edilir.

Ticarət obyektləri üzrə:

Xüsusi karantin rejimi dövründə supermarketlər, ərzaq mağazaları və apteklər istisna olmaqla, bütün ticarət obyektlərində müştərilərə yerində xidmət dayandırılır, çatdırma və onlayn satışlara məhdudiyyətsiz icazə verilir.

İctimai iaşə obyektləri üzrə:

Xüsusi karantin rejimi dövründə bütün ictimai iaşə obyektlərində, o cümlədən restoran, kafe və çay evlərində müştərilərə yerində xidmət dayandırılır və evə götürmə, çatdırma və onlayn satışlara məhdudiyyətsiz icazə verilir.

Əhalinin hərəkəti üzrə:

Bütün bulvar, park və istirahət məkanlarına insanların sıxlığını tənzimləmək məqsədilə giriş məhdudlaşdırılır.

“Qlobal Riserç” (Global Research) bildirir ki, hazırda dünyanın 40 ən böyük əczaçılıq (farmasevtika) şirkəti koronavirusa qarşı vaksinin və ya dərmanın hazırlanması istiqamətində elmi araşdırmalarını davam etdirir. Bu işə milyardlarla dollar xərclənir. Ancaq koronavirusa qarşı effektli vasitənin daha çox gəlir gətirəcəyi bəri başdan məlumdur. O da aydındır ki, bu ilin sonuna kimi belə bir vasitənin apteklərdə satılacağı inandırıcı görünmür.

Ancaq koronovirusla mübarizədə təbabət getdikcə daha çox təcrübə qazanır və daha çox insanı müalicə etmək mümkün olur. Biz bu prosesin real nəticəsini Çində gördük. Orada koronavirusa yoluxanların sayı kəskin şəkildə azalıb, bu virusa yoluxanlar arasında ölüm faizi də ciddi şəkildə aşağı düşüb, müalicə nəticəsində tam sağalanların sayı isə artır.

Təəssüf ki, İtaliyada vəziyyət nəzarətdən çıxıb. Bir gündə min nəfərdən çox xəstə koronovirusdan ölüb. Bu, rekord göstərici sayılır.

“Qlobal Riserç”dən bildirir ki, koronavirusun müalicəsi ilə bağlı ABŞ-da da ciddi irəliləyiş müşahidə olunur. Çində koronavirus daşıyıcını müəyyən etmək üçün aparılan testə 40 dəqiqə sərf olunurdu. Amerikada isə bu prosesə cəmi 15 dəqiqə bəs edir.

Nyu Yorklu həkim Vladimir Zelenkonun müalicə metodu isə Amerikada geniş rezonans doğurub. O, müalicə etdiyi 500-dən çox pasientin hamısını sağalda bilib. Yoluxanların heç biri xəstəxanaya yerləşdirilməyib, ölüm hadisəsi də qeydə alınmayıb. Başqa sözlə desək, həkim 100 faizilik uğura imza atıb.

O da maraqlıdır ki, Vladimir Zelenkonun müalicə üsulu çox ucuz başa gəlir. Belə ki, həkim koronavirusa qarşı sinkli hidroksixloroxin (Hydroxychloroquine with Zinc, Гидроксихлорохин) istifadə edir. Bu isə 12 dollarlıq xərc aparır.

Fevralın əvvəlində ABŞ-da koronavirus testini həyata keçirmək üçün vətəndaş 3 min dollar ödəməli olurdu. Bir çox hallarda isə tibbi sığorta şirkətləri həmin vəsaiti ödəməkdən imtina edirdi. Yəni bir aylıq maaşı verib testdən keçirdin. İndi isə belə testdən keçmək üçün 100-250 dollar arası məbləğ ödənilir.

Onu da qeyd edək ki, hazırda koronavirus məhz Nyu Yorkda sürətlə yayılır. 40 min nəfərə yaxın adamda bu virus aşkar edilib. Nyu York koronavirus baxımından Amerikanın episentri hesab olunur.

“Foks Nyus”(Fox News) açıqlama verən ekspertlər Vladimir Zelenkonun metodunu yüksək dəyərləndiriblər. Bu isə o deməkdir ki, bu metod ABŞ-da geniş şəkildə tətbiq olunacaq.

Vaşinqton Post (The Washington Post) yazır ki, yəhudi əsilli rusiyalı həkimin əldə etdiyi nəticə Ağ Evin də diqqət mərkəzindədir. Belə ki, Donald Tramp administrasiyasının yeni şefi Mark Meadovs onunla sıx əlaqə saxlayır. Ağ Evin xüsusi etimad göstərdiyi mütəxəssislər də bu prosesi yaxından izləyir. Onların hesablamasına görə, Vladimir Zelenko indiyə kimi 500 nəfərdən artıq pasienti müalicə edib.

Ağ Ev bildirir ki, Vladimir Zelenko müalicə üçün sinkli hidroksixloroxin ilə yanaşı antibiotiklərin kombinasiyasından istifadə edir. Bu tip dərmanları hazırlamaq üçün adətən 9 ay vaxt lazım gəlir. Ancaq Vladimir Zelenkonun metodu ilə effektli məhlulun əldə olunması üçün cəmi 3 gün yetir.

Ağ Evin bu müalicə metoduna marağı o həddədir ki, prezident Donald Tramp hidroksixloroxin və azitromisindən koronavirusa qarşı istifadə etməyi məsləhət bilib. Onu bu bəyanatı bütün dünyada geniş rezonans doğurub. Qeyd edək ki, ABŞ-ın 48-ci vitse-prezidenti Mayk Pens də prezidentin bu yanaşmasının qatı tərəfdarıdır. Amerika prezidentinin bu bəyanatı Vladimir Zelenkonun əldə etdiyi nəticələrdən qaynaqlanıb.

Amerika prezidenti Fransanın Aix-Marseille Universitetindən Didier Raoultun 40 pasientlə işləyib və uğur qazandığından da xəbərdar olub.

Didier Raoultun elm aləmində ciddi nüfuz sahibidir. Çarliz Darvinin təkamül nəzəriyyəsini belə cəfəngiyat adlandırıb.

“Eenews” saytı yazır ki, virusologiya (infeksion xəstəliklər) üzrə tanınmış mütəxəssis olan fransız alimi kiçik bir qrupla Çin alimlərinin Hidroksixloroxinlə bağlı əldə etdiyi nəticələri araşdırıb. Yerli xəstəxanada keçirilən araşdırmadan sonra koronavirusa yoluxanlara məsləhət bilinib ki, Hidroksixloroxindən istifadə etmək olar və bu cür müalicə müsbət nəticə ilə yekunlaşır.

O da maraqlıdır ki, Amerikanın səhiyyə departamenti 46 yaşlı Vladimir Zelenkonun müalicə metoduna elə bir maraq göstərmir və elan olunan nəticələrə şübhə ilə yanaşır.

Bir sıra tibbi ekspertlər dərhal bu açıqlamanın əsassız olduğunu qeyd ediblər. Məsələn, Milli Allergiya və İnfeksion Xəstəliklər İnstitutunun icraçı direktoru Entoni Fausi həmin dərmanların müsbət nəticə verib-verməyəcəyi barədə suala “yox” cavabını verib.

“Buna dair heç bir elmi sınaq və sübut yoxdur”, - deyə Dr. Fausi qeyd edib.

20 illik iş təcrübəsi olan və 2000-ci ildə Nyu-York Dövlət Universitetini (Buffalo) bitirən Vladimir Zelenko isə öz nəticəsindən məmnundur və onu yaymağa çalışır.

Fransa, Çin və Avstraliyada aparılan araşdırmalar göstərir ki, malyariyaya qarşı istifadə olunan Hidroksixloroxin və Azitromisin (Hydroxychloroquine and Azithromycin (Z-Pak)) koronavirus xəstələrini 6 gün ərzində 100 faizlik nəticə ilə sağaldır. Bu məlumatı isə mövzu ilə bağlı mübahisələrə qoşulan “techstartups.com” saytı yazır.

Radikal ortodoks yəhudi həkim Vladimir Zelenko Yutub üzərindən yaydığı müraciətində deyir ki, pasientlərimi Hidroksixloroxin sulfatla müalicə edirəm, təklif etdiyim üsulla müalicə başladıqdan 4-6 saat sonra pasientlərdə nəfəs darlığı ilə bağlı problem aradan qalxır. Koronavirus xəstlərində nəfəs darlığı son dərəcə önəmli məsələdir və bir çox xəstə tənəffüs problemi ilə əlaqədar olaraq ölür.Məsələn, İtaliyada xəstələrin çoxu tənəffüs aparatının olmaması ucbatından vəfat edir.

Qeyd edək ki, Azərbaycanda cəmi 300 tənəffüs aparatı var. Hazırda tənəffüs aparatı almaq son dərəcə çatindir. Çünki koronavirusdan dolayı bütün ölkələr bu aparatdan almağa can atır.

Söhbət həm də ondan gedir ki, koronavirusa qarşı dərman hazırlamağa xeyli vaxt lazımdır. Ancaq bəşəriyyətin o qədər vaxtı yoxdur. Bütün dünya iqtisadiyyatı sıradan çıxıb. Demək olar ki, Yer üzündə iş dayanıb. Bu amil özü də bəşəriyyətə ciddi problemlər yaşadacaq.

Şübhəsiz ki, Azərbaycan həkimləri də koronavirusun müalicəsi ilə bağlı dünyada gedən bu kimi prosesləri yaxından təqib etməli və öyrənməlidirlər. Belə mütərəqqi üsullar pasientlərin müalicəsində əvəzsiz vasitəyə çevrilə bilər.

Musavat.com