Ermənistan silahlı qüvvələrinin bölmələri cəbhənin müxtəlif istiqamətlərində iriçaplı pulemyotlardan da istifadə etməklə sutka ərzində atəşkəs rejimini 149 dəfə pozub.

İKSmedia.az-a Müdafiə Nazirliyindən verilən məlumata görə, Ermənistan Respublikası Noyemberyan rayonunun Şavarşavan kəndində və adsız yüksəkliklərdə, İcevan rayonunun Paravakar kəndində və adsız yüksəkliklərdə yerləşən mövqelərdən Ağstafa rayonunun Köhnəqışlaq, Qazax rayonunun Kəmərli, Qaymaqlı, Fərəhli kəndlərində və adsız yüksəkliklərdə, Berd rayonunun Mosesqex, Çinari, Ayqedzor kəndlərində və adsız yüksəkliklərdə yerləşən mövqelərdən Tovuz rayonunun Ağdam, Koxanəbi, Ağbulaq, Muncuqlu kəndlərində və adsız yüksəkliklərdə, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonunun Zamanlı kəndində və adsız yüksəkliklərdə yerləşən mövqelərimiz atəşə tutulub.
Tərtər rayonunun işğal altında olan Göyarx, Çiləbürt, Yarımca, Ağdam rayonunun Baş Qərvənd, Cəvahirli, Qaraqaşlı, Kəngərli, Novruzlu, Yusifcanlı, Mərzili, Xocavənd rayonunun Kuropatkino, Füzuli rayonunun Aşağı Veysəlli, Qobu Dilağarda, Qərvənd, Qaraxanbəyli, Qorqan, Horadiz, Cəbrayıl rayonunun Nüzgar və Mehdili kəndləri yaxınlığında, həmçinin Goranboy, Tərtər, Ağdam və Xocavənd rayonları ərazisindəki adsız yüksəkliklərdə yerləşən mövqelərdən də Silahlı Qüvvələrimizin mövqeləri atəşə tutulub.

Bakıda 34 yaşlı kişi intihar edib.

İKSmedia.az report-a istinadən xəbər verir ki, 1983-cü il təvəllüdlü Cəlal Qazanov özünü Yasamal rayonunda yeni tikilmiş hündürmərtəbəli binalardan birinin 17-ci mərtəbəsindən atıb.
C.Qazanov hadisə yerində dünyasını dəyişib.

Faktla bağlı istintaq aparılır.

Dövlət Sərhəd Xidmətinin əməkdaşları «Astara» sərhəd nəzarəti məntəqəsində narkotik vasitələrin Azərbaycana gətirilməsinin qarşısı alıblar.

DSX-nin Mətbuat Mərkəzindən İKSmedia.az-a verilən məlumata görə, iyulun 16-da İrandan Azərbaycana qayıdan Cəlilabad şəhər sakini, 1989-cu il təvəllüdlü Abıyev Səbuhi Zakir oğlunun davranışı şübhə doğurduğundan saxlanılaraq üzərində şəxsi yoxlama aparılıb.

Şəxsi yoxlama zamanı zərurət yarandığından vətəndaşın daxili orqanları həkim müayinəsindən keçirilib və nəticədə düz bağırsağından narkotik vasitələr olan 242 qram həşiş, 56 qram kokos, 72 qram metamfetamin aşkar olunaraq götürülüb.

Fakt üzrə əməliyyat-istintaq tədbirləri davam etdirilir.

Azərbaycan Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun İnsan Alveri Qurbanlarına Yardım Mərkəzi 2017-cı ilin yanvar-iyun aylarında 60 nəfər şəxsə müxtəlif növ yardımların göstərilməsini təmin edib.

Nazirliyin İctimaiyyətlə əlaqələr şöbəsindən  İKSmedia.az-a verilən məlumata görə, onlardan 45 nəfərini Daxili İşlər Nazirliyinin İnsan Alverinə Qarşı Mübarizə Baş İdarəsi tərəfindən Mərkəzə yönləndirilmiş insan alveri qurbanları təşkil edib. Qalan 15 nəfər isə potensial insan alveri qurbanlarından, yəni insan alveri təhlükəsi ilə üzləşmək riski olan şəxslərdən ibarət olub.

Qeyd olunan 60 nəfərin əksər qisminə ehtiyacları nəzərə alınmaqla sosial reabilitasiya olunmaları məqsədilə eyni vaxtda bir neçə növdə yardımlar göstərilib. Ümumilikdə Mərkəz 30 nəfərə hüquqi, 25 nəfərə psixoloji, 22 nəfərə tibbi yardımlar göstərilməsini təmin edib. Nazirlik yanında Dövlət Məşğulluq Xidməti ilə birgə 11 nəfərin münasib iş yerləri ilə təmin olunmaları, 4 nəfərin əmək bazarının tələblərinə uyğun peşələr üzrə peşə hazırlığı və əlavə təhsil kurslarına cəlb olunmaları üçün müvafiq işlər görülüb. Müvafiq şəxslərdən 10 nəfəri isə ehtiyaclarına uyğun olaraq, sığınacaqla təmin ediliblər. Aparılan işlər nəticəsində insan alveri qurbanlarının əksər hissəsinin sosial reabilitasiyasına nail olunub, digər şəxslərlə işlər isə davam etdirilir.

Azərbaycan Prezidentinin 2014-cü il 24 iyul tarixli 667 nömrəli sərəncamı ilə təsdiq olunmuş “Azərbaycan Respublikasında insan alverinə qarşı mübarizəyə dair 2014-2018-ci illər üçün Milli Fəaliyyət Planı”na uyğun olaraq, ölkənin ayrı-ayrı bölgələrində insan alveri ilə bağlı ictimai məlumatlandırma tədbirləri də davam etdirilib. Belə ki, Biləsuvar, Masallı, Astara, Siyəzən, Şabran, Qusar və digər rayonlarda daha çox gənclərin iştirakı ilə “İnsan alverinə “Yox!” deyək” mövzusunda tədbirlər keçirilib. Tədbirlərdə Mərkəzin əməkdaşları tərəfindən insan alveri və insan alverinə qarşı mübarizə, insanların hansı hallarda insan alveri qurbanına çevrilmək riski ilə üzləşdikləri və belə hallardan qorunmaq yolları, İnsan Alveri Qurbanlarına Yardım Mərkəzinin fəaliyyəti və s. barədə məlumatlar verilib.