Azərbaycana rəsmi dövlət səfərinə gələn Almaniya Federativ Respublikasının Prezidenti Frank Valter Ştaynmayerin Prezident İlham Əliyevlə təkbətək görüşündən sonra liderlərin mətbuata verdikləri bəyanatın məzmunundan görünür ki, iki ölkə arasında münasibətlər yeni siyasi və iqtisadi zəmində inkişaf edəcəkdir. Təbii ki, bu gedişatın əsasında ilk növbədə Cənubi Qafqaz regionunda Azərbaycanın ərazi bütövlüyünün bərpası və hazırkı beynəlxalq vəziyyət durur. Yeni münasibətlər dövrünün fövqündə Azərbaycan durur. Çünki, sovetlər birliyinin dağılması fonunda Ermənistan təcavüz yolunu tutaraq beynəlxalq tərəfdarlar koalisiyasının köməyi ilə Azərbaycanın 20 faizə qədər torpağını işğal etmişdi. Xalqımız və ölkəmizin rəhbərliyi gərgin beynəlxalq təzyiq və iqtisadi çətinliklərə qalib gələrək ayaq üstə dayanmağı bacarmış, sürətli inkişaf yolu və ağıllı siyasətlə güc toplayaraq düşməni ərazilərimizdən qovmağa nail olmuşdur. Müasir dövrdə dünyada belə uğura imza atan ikinci bir dövlət yoxdur. Bununla da beynəlxalq münasibətlər sferasının mühüm qolu olan Cənubi Qafqaz regionunda Azərbaycanın dominantlığı ilə yeni siyasi və iqtisadi şərait yaranmışdır. Bu isə öz növbəsində digər ölkələrin siyasətinə təsir etmişdir. Təsadüfi deyil ki, Prezident İlham Əliyev Frank Valter Ştanmayerlə təkbətək görüşdən sonra verdiyi bəyanatda deyib: “Mən tam əminəm ki, bu səfər bizim əlaqələrimizə yeni müsbət təkan verəcəkdir”.
Müsbət təkanlar həm iqtisadi, həm də siyasi sahədə münasibətləri sürətləndirəcəkdir. Ukrayna-Rusiya müharibəsinə görə Rusiya ilə üz-üzə gələn Avropa Birliyi ölkələrinin indi enerji ehtiyatlarına tələbatı kəskin artıb. Digər tərəfdən dünənə qədər Aİ ilə sıx təmasda siyasət yürüdən Amerika Birləşmiş Ştatları artıq Donald Trampın prezident seçilməsi ilə kursunu xeyli dəyişib. Tramp administrasiyası ABŞ-ın dünya siyasətində hegemon rolunu artırmaq üşün iqtisadi amillərdən yararlanmağa meyillidir. Bu isə ənənvi tərəfdaşlar arasında fikir və ənəl ayrılıqlarına səbəb olur. Belə olan halda təbii ki, beynəlxalq aləmdə yeni tərəfdaşlıq əlaqələri yaranır və yaxud köhnə əlaqələr daha da güclənir. Məsələn, 2025-ci ilin ilk aylarında Almaniya Azərbaycandan xam neft alışını təxminən üç dəfə artırıb. Amma prezidentlərin görüşündən sonra, şübhəsiz ki, qeyri-neft sektorunda da ticarət dəfələrlə artacaq. Çünki, Almaniyada yüksək texnologiyalı sənaye sahələri yüksək inkişaf etsə də xammal sarıdan müəyyən qıtlıq hiss olunur. Xoş münasibətlər fonunda qarşılıqlı mənfəət əsasında bu istiqamətdə əlaqələrin inkişafı qaçılmazdır.
Siyasi sahədə daha böyük irəliləyişlərin olması gözlənilir. Belə ki, Almaniya Prezidenti əvvəl Ermənistana səfər edib, ardınca isə Azərbaycana gəlib. Bu da o deməkdir ki, Ştanmayer Cənubi Qafqazın iki ölkəsi arasında gözlənilən sülh müqaviləsinə öz töhfəsini vermək arzusundadır. Təsadüfi deyil ki, İlham Əliyev həmkarı ilə görüşdən sonra “səmimi görüş” ifadəsini işlədib. Bu da ona işarə ola bilər ki, Frank Valter Ştanmayer Ermənistanın Azərbaycana təcavüzü ilə əlaqədar vaxtı ilə ölkəsinin tutduğu mövqenin qeyri-rasionallığını etiraf edib.
Səfərin nəticəsi kimi bədnam Minsk qrupunun tezliklə ləğvi məsələsində də Almaniya Avropa Birliyi tərəfdən səmərəli təşəbbüs göstərə bilər.
Novruz Novruzov
Azad Vətən Partiyası Siyasi Şurasının sədri