Bakı şəhərində müəyyən ərazilərdə avtonəqliyyat vasitələrinin sıxlığını azaltmaq məqsədilə “Azəravtoyol” ASC tərəfindən kompleks tədbirlər həyata keçirilir.
“Azəravtoyol” ASC–nin mətbuat xidmətindən bildirilib ki, tədbirlər çərçivəsində Moskva prospektinin köməkçi yolunda, Bakı-Sumqayıt yolundan “Şamaxinka” deyilən əraziyə girişdə avtonəqliyyat vasitələrinin hərəkətində müəyyən dəyişikliklər edilir.
Belə ki, xüsusən günün pik saatlarında sözügedən əraziyə avtonəqliyyat vasitələrinin həm “Bakı Dairəvi-1” avtomobil yolundan, həm də Sumqayıt şəhəri istiqamətindən daxil olması və bir çox hallarda sürücülərin avtomobili nizamsız şəkildə idarə etməsi “tıxac”a, hərəkətin iflic olmasına səbəb olur. Sıxlığın, o cümlədən hər iki istiqamətdən daxil olan avtonəqliyyat vasitələrinin bir-birinin hərəkətinə mane olmasının qarşısını almaq məqsədilə prospektin köməkçi yolundakı sağ kənar zolaq “Bakı Dairəvi-1” avtomobil yolundan gələn avtomobillər üçün ayrılır. Sağ kənar zolağı digər iki zolaqdan ayırmaq üçün yola dəmir-beton maneələr düzülür.
Maneələr tunelin üzərində yerləşən birinci geri dönməyə qədər düzüləcək. Bununla da, dairəvi yoldan gələn avtonəqliyyat vasitələri məcburi şəkildə ancaq tunelin üzərindəki ikinci geri dönmə hissədən istifadə edərək geri dönməni həyata keçirə biləcəklər.
Nəticədə Sumqayıt şəhəri istiqamətindən gələn avtonəqliyyat vasitələri ilə dairəvi yoldan çıxan avtomobillərin həmin ərazidə kəsişməsi aradan qaldırılacaq və “tıxac” müəyyən qədər azaldılmış olacaq.
“Şamaxinka” ərazisində ediləcək daha bir dəyişiklik yolun genişləndirilməsi ilə bağlıdır. Belə ki, yol sağa doğru 3-4 metr enində genişləndiriləcək. Bunun üçün artıq hazırlıq işlərinə başlanılıb. Genişləndirmədən sonra yolda daha bir hərəkət zolağı yaranmış olacaq. Bu da öz növbəsində sözügedən ərazidə sıxlığın qarşısının alınması məqsədini daşıyır.
Genişləndirmə işləri ilkin mərhələdə Moskva prospektinin “Bakı Dairəvi-1” avtomobil yolu ilə kəsişməsindən “2-ci Alatava” küçəsi ilə kəsişməyədək olan hissəsində aparılacaq.
Bütün işlərin qısa müddət ərzində yekunlaşdırılması planlaşdırılır. Bu məqsədlə əraziyə lazımi sayda canlı qüvvə və texnika cəlb olunur.