ABŞ Federal Təhqiqatlar Bürosunun əməkdaşları prezident Donald Trampın keçmiş vəkili Maykl Koeni həbs ediblər. Virtualaz.org ABŞ KİV-lərinə istinadən xəbər verir ki, dələduzluqda ittiham olunan Koen ötən gün avqustun 21-də özü könüllü FTB-yə gedib. Bu, Koenin vəkilləri ilə prokurorlar arasında əldə edilmiş sövdələşmə çərçivəsində baş tutub. Sövdələşmə Koenin vergilərdən yayınması, Trampın seçkiqabağı kampaniyasının maliyyələşdirilməsi ilə bağlı qanunsuzluqlar, habelə bank sferasında maxinasiyalar barədə ittihamlara aiddir.
Sövdələşməyə əsasən Koen bu ittihamlar üzrə özünü təqsirli bilir, ittiham tərəfi isə ona yüngül cəza tələb etməyə razılaşır. Lakin mənbələrə görə Koen və prokurorlar həbs müddəti barədə razılığa gələ bilməyiblər. Hüquqşünasın vəkilləri israr edir ki, Koen uzağı üç il həbs cəzası almalıdır. Prokurorlar isə 4 il və daha çox həbs cəzası barədə danışır. Maykl Koen Trampın hüquqşünaslar komandasının “1 nömrəli” üzvü olub və həm seçki kampaniyası dövründə, həm ondan əvvəl onun maraqlarını müdafiə edib.
Koen FTB-yə təslim olduqdan sonra Nyu-York vaxtı ilə ötən gün saat 23.00-da məhkəməyə çıxarılıb. O, məhkəmədə hər şeyi etiraf edib, maliyyə cinayətlərini Trampın tapşırığı ilə həyata keçirdiyini bildirib.
Koen yalan ifadə verməyəcəyinə dair and içərək jüriyə bildirib ki, Tramp seçkilərin nəticələrinə təsir etmək məqsədi ilə ona iki qadına pul ödəməyi tapşırmışdı. Söhbət Donald Trampla intim münasibətlərdə olmuş pornoaktrisa Stefani Klifforddan və “Playboy” jurnalının keçmiş modeli Karen Makduqaldan gedir. Tramp Melaniya ilə evli olduğu halda həmin qadınlarla intim münasibətlərdə olub. Və bu məsələnin seçki kampaniyası zamanı açıqlanmasına və nəticədə seçkilərin nəticələrinə təsir göstərməsinə imkan verməmək üçün vəkili vasitəsilə onlara yüz minlərlə dollar ödəyib.
“Əgər bu qadınlara pul ödəmək Makyl Koen üçün cinayətdirsə o zaman nəyə görə Donald Tramp üçün də cinayət sayılmasın?”-Koenin vəkili məhkəmədə sual edib.
CNN bildirir ki, Koen məhkəmədə birbaşa Trampın adını çəməyib, amma məhkəmə sənədlərində prezidentin adı “Şəxs-1” kimi keçir.
Koen məhkəmədə Trampın seçki kampaniyasını maliyyələşdirmək üçün qanunsuz yollarla 500 min dollar kredit aldığını da etiraf edib.
Koenin vəkili deyib ki, onun müdafiə etdiyi şəxs Rusiyanın seçkilərə müdaxiləsini araşdıran xüssui prokuror Robert Mülleri maraqlandıra biləcək informasiyaya da malikdir. Vəkil Lenni Devisin bildirdiyinə görə Koen xüsusi prokurora 2016-cı il seçkilərində Amerika demokratik sistemini gözdən salmağa yönəlmiş sövdələşmə, Trampın demokratların seçki qərargahına haker hücumları barədə məlumatlı olduğu haqda xüsusi prokurora ifadə verməkdən “xoşbəxt olacaq”.
Maykl Koenin xüsusi prokurora Tramp-Rusiya sövdələşməsi barədə bildiklərini danışması Müllerin ABŞ prezidentinə ittiham irəli sürməsinə gətirib çıxara bilər. Hesab edilir ki, Müller Trampın əleyhinə artıq bir sıra dəlillər toplayıb.
Ümumiyyətlə bu günlərdə Trampın başı üstündə buludlar sıxlaşır. Koenin həbs edildiyi gün Virciniya məhkəməsi onun seçki qərargahının rəhbəri olmuş Pol Manafortu 18 ittihamdan 8-i üzrə təqsirli bilib. Bura vergilərdən yayınma, maliyyə maxinasiyaları, xaricdə gizli bank hesabı açmaq ittihamları da daxildir. Manafort hazırda həbsdədir və onu uzunmüddətli cəza gözləyir.
Virtualaz.org