Gələn il Fransada növbəti prezident seçkiləri keçiriləcək. Hazırkı prezident Emmanuel Makronun əsas rəqiblərindən biri, bəlkə də birincisi mühafizəkar Respublikaçılar partiyasının sədri Kristian Cekobdur. Mühafizəkarların rəhbəri artıq indidən fəaliyətə başlayıb. O, 65583 üzvü birləşdirən partiyanın fəallarına məktub göndərərək onları “qələbə” axtarışına çağırıb.
K.Cekob partiya fəallarını 2022-ci il prezident seçkisi yolunda onun namizədliyini dəstəkləməyə çağırıb: “Sən mənimlə yanaşı getsən, bilirəm ki, sənin dəstəyinlə qarşıdakı aylarda bizim hamımızın can atdığımız qələbəyə doğru gedən yolda qarşımıza çıxan bütün maneələri dəf etmək üçün bütün vəsaitlərimiz olacaq”. 16 səhifəlik qəzet həcmində olan partiya sədrinin müraciəti iki-üç aydan bir paylanacaq.